martes, 20 de decembro de 2016

O lugar de Escocia en Europa / Scotland's place in Europe #Brexit #ScotlandinEurope

Nicola Sturgeon ven de publicar o primeiro (e único ata o momento) plan gubernamental en territorio de Reino Unido para tratar a situación actual que provocou o resultado do referendo do #Brexit

"Scotland's Place in Europe" (O lugar de Escocia en Europa) é unha concisa exposición do que supón para Escocia abandoar a UE e o Mercado Único; tamén indica as  propostas oficiais que o Goberno escocés vai presentar ao Goberno de Londres para ser debatidas no inicio de 2017.

Theresa May anunciou durante a Conferencia dos Conservadores que o artigo 50 sería activado a finais de marzo de 2017, pero este anuncio veuse bloqueado cunha sentenza do Tribunal Supremo que obriga ao debate e votación previos na Cámara dos Comúns. Actualmente o Goberno británico está presentando as súas alegacións a esta sentenza.

Escocia está decidida a pelexar polo seu lugar en Europa, e ven desarrollando toda unha estratexia de fortalecemento das relacións internacionais, en especial con Bruxelas onde hai uns días Alex Salmond foi recibido por Jean-Claud Juncker. Esta visita foi amplamente silenciada polos medios de prensa internacionais nun intento mais de minimizar a grave situación á que se enfrenta o goberno británico logo da votación do 23 de xuño de 2016.
A First Minister escocesa ven actuado rauda e contundentemente dende o día seguinte ao referendo do Brexit e marcando as diferenzas co caos reinante en Londres; amósase plena e totalmente disposta a defender os intereses do pobo escocés ata as últimas consecuencias. O desastre que suporía para para Escocia o chamado "Brexit duro" enfróntase  en esencia coa seguinte estratexia de negociación: 

1º) Intentar a permanencia de Reino Unido no Mercado Único

2º) Se a primeira opción non é posible, intentar que Escocia poida permanecer dentro do Mercado Único con máis competencias das que ata agora se lles transferiron.

3º) No caso de que se ignore totalmente estas dúas premisas anteriores, forzar un segundo referendo de independencia en Escocia. De darse esta situación o Gabinete de goberno de Nicola Sturgeon xa está preparando lexislación que permitiría a celebración deste segundo plebiscito.

Durante a súa intervención, Nicola Sturgeon recordou as frases que utilizou o Goberno británico durante a campaña de 2014, e mais recentemente despois do referendo do Brexit que aseguraban que Gales, Norte de Irlanda, Escocia e Inglaterra ocupan igual lugar e relevancia na política global de Reino Unido. Agora se verá se iso é certo, e a que porto poden chegar estas negociacións internas.

Sen dúbida unha das cuestións que máis preocupa ao Goberno escocés, aparte da enorme repercusión económica (a nivel de administracións locais, pesca, agricultura, comercio, turismo, etc..)  é a situación na que quedarían os dereitos dos traballadores protexidos actualmente por leis e normas europeas; e por suposto a cuestión da liberdade de movemento , algo no que Sturgeon e o seu equipo insisten cada día, especialmente daqueles cidadáns europeos que fixeron de Escocia o seu lugar para vivir e traballar. Escocia quere portas abertas e liberdade de movemento para os cidadáns do mundo.

Nicola Sturgeon e o SNP gozan do apoio dos Verdes (ainda que pensan que o Goberno escocés debería ter ido mais alá e insisten na necesidade de preparar a lexislación para un novo referendo de independencia)  no Parlamento escocés cos que acadan maioría absoluta. A situación dos LibDem, Labour e, especialmente dos conservadores ven sendo moi contradictoria durante estes meses, apoiando ou criticando ao goberno indistintamente sobre os plans anunciados.

Aquí deixo o video completo da presentación do documento, onde Nicola Sturgeon atendeu posterioremente todas e cada unha das moitas preguntas realizadas pola prensa (ela non precisa plasma nin pactar cos xornalistas nada... tomade nota) 




Ningún comentario:

Publicar un comentario