mércores, 3 de decembro de 2014

RECOMENDADO: Fagamos contas. 35 anos de autonomía: Como nos foi? #Lugo #FundaciónGalizaSempre

  Desde a Fundación Galiza Sempre convidámosvos á xornada pública Fagamos contas. 35 anos de autonomía: Como nos foi? que organizaremos o vindeiro sábado 13 de decembro a partir das 11h00 no salón de actos do Pazo de San Marcos en Lugo

Facermos as contas, cos datos na man, do que supuxo e do que supón para a Galiza a dependencia política do Estado español. Facermos as contas dos resultados do período autonómico e das decisións que, impostas na maioría dos casos desde instancias superiores ao escaso autogoberno co que contamos, influíron decisivamente na nosa perda de capacidade produtiva, na mingua demográfica, nos desequilibrios territoriais ou na progresiva minorización da lingua e da cultura propias. Teñen causa última estes problemas nun mal goberno atribuíbel aos sucesivos gobernos autonómicos da dereita, na subordinación política ao Estado español e ao deseño que este garda para a Galiza, en ambos os dous combinados? Cabe algún futuro para a Galiza de seguirmos neste marco? Que proposta de país e de futuro debe pór enriba da mesa o nacionalismo no actual contexto de crise sistémica?
 
Coa xornada Fagamos Contas, organizada pola Fundación Galiza Sempre, poñemos en marcha un traballo colectivo de balance do que supuxeron para a Galiza a dependencia política e o modelo autonómico, con base na análise dos seus resultados. Nesta ocasión serán cinco mesas temáticas e dez relatorios os que abordarán esta cuestión, que terá continuidade ao longo do vindeiro 2015.


Xavier Campos
Director da Fundación Galiza Sempre

Mais información: FUNDACIÓN GALIZA SEMPRE

Ningún comentario:

Publicar un comentario