Fa qualques
meses una amiga dels Estats Units me demandèt çò que podiá far per ajudar la
causa independentista d’Escòcia. “Pas gaire”, çò foguèt ma responsa, abans de
li explicar qu’aqueste debat deviá aver luòc en Escòcia. Ara: lo Govèrn del
Reialme Unit o vei pas ansin; d’efièch, Cameron pretend que pòt pas debatre amb
Alex Salmond, ja qu’el votarà pas en setembre. Ne resulta que mon amiga, si que
pòt far quicòm, fin finala.
En genièr, lo Sunday
Herald publiquèt una notícia segon la quala lo Ministèri dels Afars
Estrangièrs del Reialme Unit aviá començat una campanha per recebre de sosten, a
l’estrange, en favor de “a Better Together” [“Melhor Ensems”, la campanha unionista
per qu’Escòcia rèste dins lo Reialme Unit]. Wee Wullie Hague [William Hague, lo
ministre dels afars estrangièrs del Reialme Unit] te vol ausir dire de
causas laidas sus l’independéncia escocesa. Segon lo Sunday Herald, los
Afars Estrangièrs an contactat los govèrns de China, Russia, Nòva Zelanda,
Austràlia e Canadà e los 28 membres de l’Union Europèa dins una cèrca
desesperada de Viagra per refortir lor Projècte Paur qu’es moligàs.
Los Afars
Estrangièrs an organizat una “Devolution Unit” (Unitat Devolucion) per coordenar
aquela campanha. Las ambaissadas, los nauts comissaris e los consolats del Reialme
Unit del Mond entièr an recebut d’instruccions per tractar tota comunicacion venent
d’individús, d’organizacions e d’entrepresas a prepaus de l’independéncia
escocesa. Coma se supausa que la foncion publica es politicament nèutra, el Govèrn
del Reialme Unit pòt pas admetre dobèrtament çò que tu sabes, çò que ieu sabi e
çò que lo chin sap a prepaus de lor afanament. Lor cal manténer una aparéncia
de neutralitat.
Mas podèm jogar
lo jòc amb doas esquipas. Donc, se sès un escocés e se vives fòra lo país, o se
sès ciutadan d’un autre país e se simpatizas amb l’independéncia escocesa,
escriu una letra formala a l’ambaissada o a la nauta comission del Reialme Unit
de ton país. Çò que lor explicaràs ven a tu, de segur, e mai se foguèsse bon que
lor exprimiguèsses ta contrarietat de veire que el govèrn britanic cèrca
activament l’intervencion internacionala per empachar l’independéncia escocesa.
I te pòdes presentar coma un estrangièr que lausa lo parlament venerable e lo sistèma
democratic exemplar del Reialme Unit.
Lor pòdes far remarcar
que t’es impossible de considerar encara lo Reialme Unit coma un modèl de
seguir, mentre que son govèrn manten una agenda esconduda per influir dins lo
debat democratic, e qu’aquela agenda esconduda causa un damatge important e duradís
a l’imatge e a la posicion del Reialme Unit dins ton país. Assegura-te de senhalar
qu’as enviat una còpia de ta letra a un membre del Parlament, un senator, un congressista
o un deputat per lor demandar se sostenon ton idèa qu’Escòcia deuriá poder
debatre sus son futur sens interferéncias internacionalas, e per lor demandar
de condemnar lo comportament del Govèrn del Reialme Unit.
A partir del
moment que lo Govèrn del Reialme Unit recèrca activament las opinions de
ciutadans e de residents estrangièrs, es tras que normal e corrècte que lor dones
tu tanben ton opinion. Explica-lor perqué creses que l’independéncia es bona
per Escòcia, bona per la rèsta del Reialme Unit e perqué serà bona aicí meteis
per lo tieu país. Se pòdes, fai de tal biais que la maxima quantitat de gents
signe ta letra abans de l’enviar a l’ambaissada o a la nauta comission britanica.
Encara melhor, se sès membre d’un club, grop o associacion, parla-ne amb d’autres
membres e buta-los a enviar la letra amb un papièr oficial de l’organizacion.
Se sès una
persona d’entrepresa, seriá perfiècha una letra amb lo papièr de l’entrepresa,
que diguèsse que creses que l’Escòcia independenta constituirà una oportunitat
d’investiment per ton entrepresa.
Insistís per que
respondan, diga qu’espèras qu’adreiçaràn la letra a la “Devolution Unit” dels Afars
Estrangièrs, i diga qu’as enviat tanben una còpia de la letra a ton jornal
local.
Alara envia-me una còpia a ieu, a l’adreiça seguenta:
Se David Cameron
pòt utilizar lo còrs diplomatic del Reialme Unit per far de politica, nosautres
tanben podèm. Aquesta iniciativa, l’organizan pas ni l’inspiran lo Govèrn Escocés,
nimai lo Partit Nacional Escocés (SNP), nimai la campanha Yes Scotland. La coordenarem
ieu, Paul Kavanagh e Pilar Fernández dempuèi Galícia. Sèm pas membres de l’SNP
ni de cap d’autre partit politic, ni d’Escòcia ni d’enluòc mai, e l’Alicsammin
[pronóncia del nom d’Alex Salmond pels unionistas] nos a pas engatjats. O fasèm
per la nòstra iniciativa pròpria e degun nos paga pas per o far, e mai se, s’aquesta
modèsta campanha pren fòrça, aquò empacharà los mèdias del Reialme Unit d’afirmar
lo contrari.
Rassemblarem totas
las responsas, e publicarem las estatisticas, anonimas, pauc abans lo referendum.
Tanben nos agradariá de publicar d’extraches d’una seleccion de las letras. Se
vòles pas que publiquem ton nom, o lo de ton entrepresa o organizacion, se te
plai, avisa-nos en dins lo corrièr. Los escoceses d’Escòcia saupràn que tenèm d’amics
e d’aliats en defòra, e s’avèm un pauc l’astre, las responsas negativas recebudas
per la “Devolution Unit” de Cameron e Hague seràn escobadas per las positivas.
Twitter: @ScotlandAbroad
Ningún comentario:
Publicar un comentario